Սեպտեմբերի 1-ից ԱՊՊԱ ոլորտում փոփոխությունների նոր փաթեթ է ներդրվելու. մանրամասնում է ՀԿ նախագահը
Սեպտեմբերի 1-ից ԱՊՊԱ ոլորտում ներդրվող փոփոխությունների փաթեթն ընդհանուր առմամբ դրական է։ Այս մասին լրագրողների հետ զրույցում ասաց «Սպառողների խորհրդատվության կենտրոն» ՀԿ-ի նախագահ Կարեն Չիլինգարյանը։ «2016թ-ի սեպտեմբերի 1-ից ԱՊՊԱ ոլորտում վարորդներն ինքնուրույն՝ համաձայնեցված հայտարարագրի լրացման միջոցով կարող են գրանցել արդեն մինչև 100.000 դրամ (ներկայում գործող 50.000 դրամի փոխարեն) վնասներով ավտովթարները»,- ասաց Կարեն Չիլինգարյանը: Համաձայնեցված հայտարարագրի միջոցով կարելի է գրանցել պատահարը 4 դեպքում, եթե պատահարին մասնակից են միայն երկու ավտոմեքենաներ, և վնաս է պատճառվել միայն այդ ավտոմեքենաներին կամ դրանցից մեկին, պատահարում ներգրավված երկու ավտոմեքենայի համար էլ առկա է գործող ԱՊՊԱ պայմանագիր, վարորդներից մեկն ընդունել է իր ամբողջական մեղավորությունը, տուժող վարորդի պահանջը մեղավոր վարորդի նկատմամբ չի գերազանցում 100.000 դրամը: Նման դեպքերում անհրաժեշտ է, որպեսզի վարորդները ձեռնարկեն որոշ գործողություններ. առնվազն երեք անգամ լուսանկարեն բախված ավտոմեքենաների փոխադարձ դիրքերն ու վնասվածքները, լրացնեն և ստորագրեն համաձայնեցված հայտարարագիրը, ազատեն ճանապարհի երթևեկելի մասը, տեղի ունեցած պատահարի մասին հեռախոսով տեղեկացնեն մեղավոր վարորդի ապահովագրական ընկերությանը՝ ներկայացնելով համաձայնեցված հայտարարագրում լրացված տեղեկությունները: Մյուս փոփոխությունն այն է, որ 2016թ-ի սեպտեմբերի 1-ից համաձայնեցված հայտարարագրով վարորդների կողմից ինքնուրույն գրանցվող ավտովթարներից բացի մնացած բոլոր ավտովթարները կգրանցվեն միայն Ճանապարհային ոստիկանության կողմից։ Հետևաբար դեպքի վայրում ապահովագրական ընկերությանը սպասելու պարտավորություն վարորդները չեն ունենա: Հաջորդ փոփոխությունը վերաբերում է նրան, որ այլևս անհրաժեշտ չի լինի ԱՊՊԱ պայմանագրերում նշել ավտոմեքենան վարող անձանց անունները (լիազորված տիրապետողներին), և ավտոմեքենաները կհամարվեն պատշաճ ապահովագրված՝ ավտոմեքենաների սեփականատերերի կողմից վարորդական իրավունք ունեցող ցանկացած անձի ավտոմեքենան վարման հանձնելու դեպքում՝ առանց դրա համար հավելյալ ապահովագրավճար վճարելու: Կարեն Չիլինգարյանը նշեց նաև, որ ապահովադիրների բոնուս–մալուս համակարգին անցման, ինչպես նաև ԱՊՊԱ ոլորտի առաջին հինգ տարիների վիճակագրության հիման վրա որոշակի ռիսկային գործակիցների ճշգրտման արդյունքում ԱՊՊԱ սակագնային համակարգն ունենալու է նոր կառուցվածք: «Սպառողների խորհրդատվության կենտրոն» ՀԿ-ի նախագահը խորհուրդ է տալիս վարորդներին մինչև 100.000 դրամ վնասներով վթարների դեպքում վարորդների գործողությունների ուղեցույցին հանգամանորեն ծանոթանալ, ինչպես նաև համաձայնեցված հայտարարագրի ձևը բեռնել, տպել ու պահել մեքենայի մեջ։
